1937 – 1945

Fyrsti sjómannadagurinn var haldinn 6.júní 1938, á björtum og svölum sumardegi. Fánar voru dregnir að hún á öllum skipum í höfninni. Sala merkja og Sjómannadagsblaðsins hófst um morguninn. Sjómenn söfnuðust saman við Stýrimannaskólann á Öldugötu og þaðan fór skrúðgangan, fánum prýdd, upp á Skólavörðuholtið. Athöfnin fór fram við Leifsstyttuna og mættu um 10 þúsund manns. Síðar fóru hátíðarhöldin fram á hafnarbakkanum þar sem keppt var m.a. í stakkasundi og kappróðri og loks var haldið á Melavöll þar sem keppt var í knattspyrnu og reipitogi. Dagurinn þótti heppnast einstaklega vel.

Á þessum tíma setti Seinni heimsstyrjöldin mark sitt á líf heimsbyggðarinnar, þ.m.t. líf íslenskra sjómanna. Ákvörðun var tekin um að hefja undirbúning og fjáröflun fyrir byggingu dvalarheimilis fyrir aldraða sjómenn en ljóst var að sú vinna yrði umfangsmikil. Óskað var eftir lóð á Laugarnesinu í Reykjavík.

Hornsteinn Sjómannaskólans lagður á Sjómannadaginn. Sú bygging hafði verið mikið baráttumál margra fulltrúa í Sjómannadagsráðinu. Athöfnin fór fram við Sjómannaskólann og menn frá Landhelgisgæslunni stóðu vörð kringum ræðupallinn við athöfnina.