1946 – 1956

Fjáröflun fyrir byggingu dvalarheimilisins hófst með krafti, m.a. með dansleikjum og kabarettsýningum sem gáfu góðan pening. Ekki voru þó allir sammála um hvort þessi fjáröflunarleið samræmdist göfugu málefni. Ákveðið var að efna til hugmyndasamkeppni um teikningu af dvalar- og elliheimili og gert var ráð fyrir að byggingin stæði á Laugarnesinu.

Dýrasýning var haldin í Örfirisey þar sem dýr voru fengin að láni frá erlendum dýragörðum: Apar, ísbirnir, sæljón, skrautfuglar og skjaldbökur voru þar á meðal. Undirbúningur var mikill: Notast var við stórar girðingar frá hernámsárunum, grafið sjávarlón og lagt rafmagn á svæðið svo eitthvað sé nefnt. Sýningin vakti mikla athygli og stóð í tvo mánuði. Ágóðinn var nokkuð góður en sýningin þótti einstaklega vel heppnuð. Sjómannadagsráð hélt áfram að sinna ýmsum baráttumálum stéttarinnar og halda sjómannadaginn hátíðlegan. Á 10 ára afmælinu var því Sjómannadagsráð orðið heljarmikið fyrirtæki.

Efnt til samkeppni og óskað eftir hugmyndum að teikningum að dvalarheimilinu. Ágúst Steingrímsson byggingafræðingur hlaut 1.verðlaun en mikil óvissa ríkti um lóðina á Laugarnesi.

Samþykkt var að byggja í Laugarási þar sem ljóst var að lóðin á Laugarnesi fengist ekki. Efnt var til skyndihappadrættis til fjáröflunnar. Stuttu síðar gerði Byggingarnefnd tillögur um að húsnæðið yrði byggt fyrir 120 vistmenn, með herbergjum fyrir einn og tvo og auk þess sjúkradeild fyrir 40 sjúklinga. Tveimur árum síðar voru hús dvalarheimilisins steypt en byggingarframkvæmdir gengu hægt fyrstu árin, m.a. vegna skorts á fagmönnum og fjármagni.

Árið 1954 var stórt ár í sögu Sjómannadagsráðs þegar leyfi fékkst til að vera með kvikmyndahúsarekstur. Sama ár fékkst leyfi til að reka árlegt happdrætti með bíla og búnaðarvélar sem vinninga og þar með var Happdrætti DAS stofnað. Árið 1956 var ákveðið að hefja kvikmyndasýningar fyrst um sinn í borðsal dvalarheimilisins og byrjað var að byggja kvikmyndahús. Byggingaframkvæmdir gengu hægt þessi árin, m.a. vegna skorts á fagmönnum.