Hraunborgir

Jörðin Hraunkot (Hraunborgir) við Kiðjabergsveg í Grímsnes- og Grafningshreppi var keypt af Sjómannadagsráði árið 1964 og er jörðin u.þ.b. 600 hektarar.
Til að mæta þörfum ferðamanna hefur verið lögð áhersla á uppbyggingu hjólhýsa- og tjaldsvæðis. Góð hreinlætisaðstaða er á staðnum ásamt góðu aðgengi fyrir fatlaða. Svæðið er mjög vinsælt meðal fjölskyldufólks, starfsmannafélaga og vinahópa. Þar eru einnig haldin fjölmörg ættarmót á ári hverju en í Hraunborgum er sérlega gott útivistarsvæði, bæði fyrir börn og fullorðna. Á svæðinu er m.a. minigolf, sparkvöllur, hjólaleiga, níu holu golfvöllur, leiktæki fyrir börn og útsýnisskífa þar sem hægt er að sjá hvernig landið liggur og læra helstu örnefni nágrennisins.

 Þjónustumiðstöðin í Hraunborgum er með sundlaug, þremur heitum pottum og gufubaði. Sundlaugargestir geta notið sumarblíðunnar við góðar aðstæður, hvort sem þeir vilja busla í lauginni eða slaka á í heitu pottunum og gufubaðinu. Þjónustumiðstöðin er með yfirbyggðum sólpalli þar sem hægt er að slappa af og grilla. Innandyra er margt hægt að gera sér til dægrastyttingar, spila billiard, þythokkí, pílukast og fótboltaspil. Þeir sem vilja taka það rólega geta sest niður og haft það notalegt fyrir framan sjónvarpið.

 Skemmtilegur 9 holu par 3 golfvöllur er við þjónustumiðstöðina. Stöðugt er unnið að endurbótum á golfvellinum, flatir hafa verið endurnýjaðar og tré gróðursett. Golfvöllurinn hentar vel bæði byrjendum sem og fjölskyldu- og vinahópum. Þá geta kylfingar, sem eru lengra komnir, ekki síður notið góðs af því að spila völlinn og æft sveifluna og stutta spilið.

 Um 248 leigulóðir eru skipulagðar fyrir orlofshús stéttarfélaga sjómanna og sumarbústaði einstaklinga.
Í dag eru 222 sumarbústaðir og hafa stéttarfélög sjómanna og önnur félagasamtök byggt 21 orlofshús.
Nýlokið er deiliskipulagi á 118 leigulóðum og þegar hefur verið ráðstafað úr því deiliskipulagi 18 lóðum.
Í dag er verið að úthluta 27 leigulóðum við Bakkavík og Hofsvík. Er þá heildarfjöldi lóða 348.
Öllum landsmönnum er frjálst að sækja um þessar sumarbústaðalóðir.

Pin It on Pinterest

Share This